العين تدمع والرجاء شـئ مفقـود
ياويل شخصٍ مـا يغيـر حياتـه
عايش على ماضي بحاضره موجود
كاسيه حتى كاتبـه فـي وصاتـه
ماكنه إلا عن ثرى الكون مطـرود
حاله نتيجة جـور مـن ذكرياتـه
ايقول انا عن باقي الخلق مقصـود
هـم وعـذاب ولا حصلـه مباتـه
ماهو بشي يطـرد الهـم موعـود
ضاعت به الحيله وراجـي مماتـه
يشكي زمانٍ فات والعالـم ارقـود
ياليت يرجع مامـن العمـر فاتـه
كم باب في وجهه من الدهر مسدود
ويلاه حتى يشتكـي مـن عصاتـه
حاله نحيل وروح الجسـم كالعـود
ماعاد تفـرق جثتـه مـن عباتـه
ماهو على مابه من الهـم محسـود
والله كفاتـه هــم والله كفـاتـه
هيهات بعد الموت وش ياكل الـدود
اللحم لاصق عظم ضاعت صفاتـه
الصبر زيـن وربنـا عـز داود
بعد اللذي عاشـه وزادت عناتـه
البيض ماهي صافيه تاتي السـود
والعمر لولا الهم وش هو حلاتـه
الله يجلي حرقة الدهـر بالجـود
بالغيث يحيي ماضمر من فلاتـه
والطير يسرح خاوي البطن ويعود
شبعان مثلـه راجعـاتٍ خواتـه
ياصاحبي كلن معه هـم معقـود
لكـن كـلٍ دبــر الله ثبـاتـه
ان كان ودك يثبت القول بشهـود
اللي غني وش لون ينفق زكاتـه
واللي غني حضه من المال ممدود
اليا مرض وش لون تنفع مياتـه
جاوب وتعرف عيش منته بمقرود
واحمده ربي واشكره في صلاته
خلك ذهين وكون شعله وبـارود
لاتحسب اللي يزهم الارض جاته
ماكانت الدنيا كـذا دون مجهـود
ياويل شخصٍ ما يغيـر حياتـه
موضوع: بعـــد الدمــع 
الأحد يناير 31, 2010 4:44 pm